ഒരിക്കൽ മൂന്ന് ആൺമക്കളുള്ള ഒരു രാജാവുണ്ടായിരുന്നു. രാജാവിന് വയസ്സായി, തനിക്ക് ശേഷം ഏത് പുത്രനാണ് തന്റെ സിംഹാസനസ്ഥനാകേണ്ടതെന്ന് തീരുമാനിക്കേണ്ട സമയം അതിക്രമിച്ചിരിക്കുന്നുവെന്ന് അദ്ദേഹത്തിന് അറിയാമായിരുന്നു. തന്റെ രാജ്യം വിവേകത്തോടെ കൈകാര്യം ചെയ്യാൻ കഴിയുന്ന മകന് തന്റെ സിംഹാസനം നൽകണമെന്ന് അദ്ദേഹം ആഗ്രഹിച്ചു.

രാജാവ് തന്റെ മൂന്ന് മക്കളെ വിളിച്ച് പറഞ്ഞു, “ഞാൻ നിങ്ങൾക്ക് ഓരോരുത്തർക്കും 100 രൂപയും ഒഴിഞ്ഞ മുറിയും തരാം. ആഴ്‌ചയ്ക്ക് ശേഷം ഞാൻ ഓരോ മുറിയും പരിശോധിക്കും, ആരുടെ മുറി ഏറ്റവും നിറയുന്നുവോ അവൻ എന്റെ പിൻഗാമിയാകും.

എല്ലാവരും സമ്മതിച്ചു.

മൂത്ത മകൻ ചിന്തിച്ചു, “ഇത്രയും വിലക്കയറ്റ സമയത്ത്, ഒരാൾക്ക് എങ്ങനെ ഇത്രയും കുറഞ്ഞ തുക കൊണ്ട് ഒരു മുറി മുഴുവൻ നിറയ്ക്കും. അയാൾക്ക് ഒന്നും ചിന്തിക്കാൻ കഴിഞ്ഞില്ല. അതിനാൽ ആ പണം ചൂതാട്ടം നടത്താനും കൂടുതൽ പണം സമ്പാദിക്കാനും അയാൾ തീരുമാനിച്ചു, അങ്ങനെ ആ മുറിയിൽ സാധനങ്ങൾ നിറയ്ക്കാൻ ആവശ്യമായ പണം ലഭിക്കും.

രണ്ടാമത്തെ മകൻ ചിന്തിച്ചു, “മുറി മുഴുവൻ നിറയ്ക്കാൻ കഴിയുന്നത്ര കുറഞ്ഞ തുകകൊണ്ട് അവന് പുതിയതൊന്നും വാങ്ങാൻ കഴിയില്ല. അങ്ങനെ അവൻ മാലിന്യമെല്ലാം പെറുക്കി ആ മുറി നിറച്ചു. അച്ഛന്റെ നിബന്ധന അനുസരിച്ച് ആ മുറി നിറച്ചതിൽ അവൻ സന്തോഷിച്ചു.

രാജാവിന്റെ ഇളയ മകൻ മാർക്കറ്റിൽ പോയി മെഴുകുതിരികളും ചന്ദന തിരികളും വാങ്ങി.

ഒരാഴ്‌ചയ്‌ക്കുശേഷം രാജാവ്‌ ഓരോ മകന്റെയും അടുത്തേക്ക്‌ പോയി.

ആദ്യം മൂത്തമകന്റെ അടുത്ത് ചെന്ന് അവൻ ആ മുറിയുടെ പുറത്ത് ഇരിക്കുന്നത് കണ്ടു. രാജാവ് അവനോട് ചോദിച്ചു, “നീ എന്തിനാണ് ഇങ്ങനെ മുറിക്ക് പുറത്ത് ഇരിക്കുന്നത്?”

മൂത്ത മകൻ പറഞ്ഞു, “ഞാൻ ചൂതാട്ടം കളിക്കാൻ പോയി, ആ തുക നഷ്ടപ്പെട്ടു. ഇപ്പോൾ എനിക്ക് ഒന്നും വാങ്ങാൻ പണമില്ല, അതിനാൽ ഇപ്പോൾ ആ മുറി നിറയ്ക്കാൻ എനിക്ക് ഒന്നുമില്ല.

അവന്റെ വാക്കുകൾ കേട്ട് രാജാവ് നിരാശനായി പറഞ്ഞു: “ഞാൻ നിനക്ക് സിംഹാസനം നൽകിയാൽ നീ ഈ രാജ്യം നശിപ്പിക്കും.”

രാജാവ് രണ്ടാമത്തെ മകന്റെ അടുത്തേക്ക് പോയി. രാജാവ് രണ്ടാമത്തെ മകന്റെ അടുത്തെത്തിയപ്പോൾ, ആ മുറിയിൽ നിന്ന് ദുർഗന്ധം വമിക്കുന്നതിനാൽ അദ്ദേഹത്തിന് ഓക്കാനം അനുഭവപ്പെട്ടു. രാജാവ് മകനോട് ചോദിച്ചു, “എവിടെ നിന്നാണ് മണം വരുന്നത്?”

രണ്ടാമത്തെ മകൻ മറുപടി പറഞ്ഞു, “അച്ഛാ.. എനിക്ക് 100 രൂപയിൽ മുറി നിറക്കാൻ വേണ്ടി വാങ്ങാൻ കഴിഞ്ഞത് മാലിന്യങ്ങൾ ആണ്. ഞാൻ ഈ മുറിയിൽ അതുകൊണ്ട് മാലിന്യം നിറച്ചു, അതുകൊണ്ടാണ് മുറിയിൽ നിന്ന് ഈ ദുർഗന്ധം വരുന്നത്. ജാവ് വീണ്ടും നിരാശനായി പോയി.

രാജാവ് തന്റെ ഇളയ മകന്റെ അടുത്തേക്ക് പോയി. അവന്റെ മുറിയിലെത്തിയപ്പോൾ ആ മുറിയിൽ നിന്ന് സുഗന്ധം പരക്കുന്നതിനാൽ രാജാവിന് സുഖം തോന്നി. രാജാവ് മകനോട് ചോദിച്ചു, “ആ 100 രൂപ കൊണ്ട് നീ എന്താണ് വാങ്ങിച്ചത്?”

മൂന്നാമത്തെ മകൻ പെട്ടിയിൽ നിന്ന് തീപ്പെട്ടി പുറത്തെടുത്ത് കത്തിച്ചു ആ മുറിയിൽ നിറയെ വെളിച്ചം നിറച്ചുക്കൊണ്ട് പറഞ്ഞു, “അച്ഛാ.. മുറിയാകെ വെളിച്ചവും സുഗന്ധവും നിറയ്ക്കാൻ ഞാൻ കുറച്ച് മെഴുകുതിരിയും ചന്ദന തിരികളും വാങ്ങി..”

ഇളയ മകന്റെ യുക്തിയിൽ സന്തോഷിച്ച രാജാവ് തന്റെ രാജ്യം ഇളയ മകന് നൽകാൻ തീരുമാനിച്ചു.

ഗുണപാഠം: ദൈവം നമുക്ക് തന്ന ഈ ശരീരം എങ്ങനെ ഉപയോഗിക്കണം, അത് നശിപ്പിക്കാനോ മാലിന്യങ്ങൾ കൊണ്ട് നിറക്കാനോ അതോ വെളിച്ചവും സുഗന്ധവും കൊണ്ട് നിറക്കാനോ എന്നത് നമ്മളാണ് തീരുമാനിക്കുന്നത്.